تخاريف قلم وكلام بقوله بدل ما هو حارق دمى

متستغربوش انى هقول كلام يمكن من وجهه نظرى انا شايفه صح وهيكون ليكم الحكم اكيد لبس متستغربوش لو لقيتو الموضوع لم حاجات كتير وممكن انتو تتوقعوا ان ده مالوش علاقه بده بس سيونى حتى لو كلامى تخاريف ابقى خرفت ولو لمره واحده . انا مصرى ومن عيله مصريه واتربيت على ارض البلد دى لا فى يوم لقيت حد من اهلى بيقولى يابنى متعرفش ده اصل هو مسيحى ولا فى يوم حتى جه فى بالى انا انى ما اصاحبش ده عشان هو مسيحى . واول الكلام اللى لازم اقوله انى باخد المصريين المسيحيين بالاحضان وكل اللى بيننا هو حب وود واحترام . اول حد بييجى ويحرص انه يقولى كل سنه وانت طيب هو حد مسيحى وانا كمان بحرص اهنيهم لأننا كلنا مصريين . القوت والرزق ربنا اللى بيكتبه وبيرزق بيه عباده لا مسيحى بياخد قوتى ولا انا باخد قوت المسيحيين . اتعلمت فى دينى وفى قرآننا الكريم " لكم دينكم ولى دين " لا فى يوم لقيت فرقت بين محمد او مرقص ولا فاطمه وتريزه . فاللى فى يوم مفكر انه هييجى يفرقنا او هيعمل حاله كره ما بيننا فهو غلطان وعبيط واهبل وعمال يضيع فى وقته لأن المنطقه دى محدش هيعرف يلعب ابدآ فيها . شوفنا الاستعمار اشكال والوان لا عرفوا يفرقونا ولا عرفوا يغيروا فى لغتنا وعشنا مصريين اصلاء الاسكندرانى لغته متغيرتش والبورسعيدى هو هو والصعيدى مسك فى لغته بايده وسنانه وغيره من اللغات اللى ابسط حاجه كانت ممكن تتغير فينا ومحدش عرف يغيرها محدش سأل نفسه ليه؟ . اقولكم انا ليه عشان اللى يعيش فى مصر دى لازم يحبها بكل ما فيها وكفايه اوى طيبه شعبها وحتى لو كانت البلد دى قاسيه اوى علينا فهنفضل نحبها . هحبها انا المصرى مسلم ومسيحى وهيفضل الدكتور جورج يعالج محمد وينقذه من الموت . وهيفضل ابانوب مرتاح للدكتور محمود وميكشفش الا عنده ويستنى لما عيدنا الصغير ييجى عشان يدوق الكحك بتاعنا . هنفضل مصريين لا فى فرق بين مسلمين او مسيحيين . غضب المسيحى ومن حقه الغضب لكنه عارف من جواه ان عمر ما المسلم يعمل كده واظن كله عارف مين اللى عمل كده . تخيلو كده لو لقدر الله مسجد حصل فيه حاجه هيقوم المسلمين على المسيحيين ويقولو لأ دول هما اللى عملو كده اعتقد احنا بفكرنا موصلناش للغباء ده او للسذاجه دى . كنت بتفرج امبارح على كابتن احمد شوبير وكان جايب كابتن مصر احمد حسن وهو فى زياره لمستشفى سرطان الاطفال كانت زياره وكان بيديلهم هدايا . دخل غرفه فيها مصطفى وميشيل مصطفى جنبه مصحفه الشريف وميشيل جنبه الانجيل ودول فى غرفه واحده واقسم كابتن شوبير ان ده ما هو مترتب . جابو ام الطفلين وقالو مفيش فرق ما بيننا وعمر ما فى حد فينا حس بكره من ناحيه التانى الدكتور اللى بيعالج الاولاد واحد فكلنا مصريين هلال وصليب مفيش بيننا فرق هنفضل مصريين . قامت وسائل الاعلام مشكوره كلها حاولت توضح ان مفيش مصرى ممكن يعمل كده سواء مسلم او مسيحى مين هيبوظ فرحه ناس ويدمر كنيسه لازق فيها جامع واللى يموت فيها مسلمين ومسيحيين . بالله عليكم فى مسلم هيعمل كده !!! . احيى وسائل الاعلام كلها انها قامت بدورها ده لكنى بقى بلوم وسائل الاعلام فى الحاجات الأخطر بكتير واللى منها اللى جاى ده بقى . الاستعمار مأثرش فى يوم علينا لا فى طبعنا ولا لغتنا ولا أى شئ لكن حاجتين أخطر بكتير عماله تقطع وتفرق ما بيننا هما " الفن والكوره " قولت الفن كله شامل غنا وتمثيل وتأليف وغيره لكن خصيت الكوره من بين كل الرياضه وتعالو كده ايدكم ولو أمثله بسيطه توضحلكم . لما ييجى فنان وسقط بنطلونه لقينا شباب كتير سقط وراه بنطلونه ولما واحد فى اغنيه يعمل ايحاءات ........ بقيت ابص كل شاب ورا بنت وبيعمل اللى شافه ولما مطرب يبقى سبب فى تحرشات ....... واما ممثل يقول كلمه هايفه تلاقيها مشيت فى الشارع المصرى هوا والكل عمال يقولها وأما مؤلف يقولك انا مش خرونج تلاقى كله بيقول نفس الكلمه فحابب بس اقول الحمد لله انى بحب مطرب ومؤلف وملحن وممثل محترم اسمه مصطفى ولقبه كامل . واما نشوف ممثل فى فيلم ياخدله 30 مليون فى فيلم او مسلسل وللعلم ده رقم هايف جدآ حاليآ وعرفت ان فى ارقام وصلت 60 مليون فى مسلسل او فيلم حتى الاعلان بقى ب 20 مليون جنيه وده اللى عرفته انه قيمه عادل امام فى اعلان فودافون الجديد وتبص تلاقى ناس مكمله عشاها نوووووووم . واما نشوف واحد يسب جماهير نادى كبير وخلينى واضح شيكابالا لما سب جمهور الاهلى اللى هما انا وانت وناس كتير غنى وفقير وكل الطبقات وملقاش حد يعاقبه واللى يحرق دمك ان الكل طالع يدافع عنه . مكنش من المفروض ان رب البيت يقوله اللى عملته ده غلط او اللاعب يطلع يعتذر او تحصل عقوبه عليه ولو عقوبه كذب تهدى الناس ما كان بقى للاعب ده انه اتسبب لنفسه فى الاهانه لوالدته اللى ربنا يرحمها ووفاتها كانت قريب طب ليه !! . مش بقول كده بواقع انى اهلاوى اقسم بالله ابدآ لكن بتكلم بحرقه مصرى مش عاجبه حال الدنيا اللى حواليه . عارفين ايه الفرق اللى بيننا وبين الناس التانيين اللى بيقولو عليهم متقدمين وعارفيه ليه بيقولو علينا ناميين وبيعتقدو انها كلمه خفيفه عن متخلفين؟ . الفرق اللى بيننا هو الحب والضمير لأننا اكثر منهم عقل واحسن منهم ذكاء واطيب منهم قلب لكن ضميرنا بيغيب عننا وبيروح فين الله اعلم عندى كلام كتير كنت عايز اقوله لكن كفايه زمانكم زهقتوا او زعلتو من كلامى وان كلامى ده زعل جمهور مطرب او ممثل او نادى كروى فأنا بعتذرله . عسى ان الكلام اللى قولته ده يريح قلبى شويه وفى امان الله .

والله كلامك كله صح يانور وميزعلش
ودى الحقيقة وكلنا اخوات

ناس تانيه زعلت